म्हारै बाबत

‘कथेसर’ राजस्थानी भासा री कथा-प्रधान तिमाही पत्रिका है। आ परलीका (नोहर) सूं छपै अर हर तीन महीना नवो अंक लेय’र आवै — राजस्थानी री नवी-जूनी कहाणियां, आलोचना, बातचीत अर दूजी भासावां सूं उल्थो।

नाम री कहाणी

सन 2011 में कथा-प्रधान पत्रिका काढण रो विचार आयो तो नाम माथै महीनां तांई मंथन चाल्यो। रामस्वरूप किसान, डॉ. सत्यनारायण सोनी अर प्रमोद कुमार शर्मा रोज नवा-नवा नाम खोजता, पण हर बार लागतो कै जिको नाम चाईजै, बो हाल कोनी लाध्यो।

आखर अेक दिन ध्यान में आयो कै राजस्थानी में कवि नै ‘कवीसर’ कहीजै — कवि अर ईसर री संधि। बस, अचाणचक कौंध्यो: कथा अर ईसर री संधि सूं सबद जलम्यो — ‘कथेसर’। ईसर माने सिरजणहार, तो कथेसर कथाकार रो पर्याय हुयो। ओ सबद इण पत्रिका रै साथै ई जलम्यो; इणसूं पैलां किणी सबदकोस में कोनी हो।

संपादक मंडळ

रामस्वरूप किसान — संपादक। राजस्थानी रा नामी कहाणीकार अर कवि। कहाणी संग्रै ‘बारीक बात’ सारू साहित्य अकादेमी पुरस्कार (2019) अर ‘राती कणेर’ रै उल्थै सारू साहित्य अकादेमी अनुवाद पुरस्कार (2003)।

डॉ. सत्यनारायण सोनी — संपादन सहयोगी। एम.ए. (हिंदी अर राजस्थानी), पीएच.डी. (महाराजा गंगासिंह विश्वविद्यालय, बीकानेर)। राजस्थानी कहाणीकार।

विसेसांक

नियमित अंकां रै साथै कथेसर घणा संयुक्त अंक अर विसेसांक काढ्या है, जियां:

• दलित साहित्य विसेसांक, महिला लेखन विसेसांक, किन्नर अर दलित साहित्य विसेसांक
• आदिवासी साहित्य विसेसांक, चेखव कथा विसेसांक, कथेतर अंक
• रामस्वरूप किसान कहाणी अंक, निशांत कहाणी अंक
• जलमसती अंक — अन्नाराम सुदामा, डॉ. नृसिंह राजपुरोहित, करणीदान बारहठ अर विजयदान देथा
• सिरजण विसेसांक — डॉ. अर्जुनदेव चारण

पत्रिका री जाणकारी

• भासा: राजस्थानी · हर बरस 4 अंक
• ISSN: 2348-9251
• RNI: RAJRAJ/2012/50837
• प्रकासण ठौड़: परलीका, नोहर, राजस्थान

राजस्थानी पोथ्यां रो ठिकाणो

अठै कथेसर रा छपी अर डिजिटल अंकां रै साथै राजस्थानी री चुणींदा पोथ्यां ई मिलै। अंक अर पोथ्यां डाक सूं भेजां, अर डिजिटल अंक खरीदतां ई थांरी लाइब्रेरी में आ जावै। राजस्थानी रा लेखक अर प्रकासक आपरी पोथ्यां अठै बेचणी चावै तो थांरो स्वागत है — म्हांसूं सम्पर्क करो।